Lede van die Sonskyn-aandtak in Bela-Bela het tydens die VLU se Soetdoring-
streekskonferensie op Saterdag 13 Maart in Mokopane komberse geskenk vir ’n nasionale kombersprojek. Op die foto is Theresa Knoetze (lid), Melanie Webb (beoordelaarsameroeper), Loret Rainer (lid), Irma Day (voorsitter) en Marinda White (sekretaris) met die pragtige komberse wat deur dié tak se vroue gemaak is.
Rika Kruger van Bela-Bela is op Vrydag 12 Maart by die Bela-Bela-landdroshof as nuwe DA-proporsionele raadslid van die Bela-Bela-munisipaliteit ingehuldig. Sy is aangestel in die plek van Rachel Masemola wat vroeër vanjaar oorlede is. Landdros Maggie Montane het die verrigtinge waargeneem. Die ander raadslede het die geleentheid deur middel van ’n aanlynvergadering bygewoon. Die inhuldiging is na die hof geskuif omdat daar op dié oggend ’n optog deur lede van die Suid-Afrikaanse munisipale werkersunie (Samwu) by die munisipaliteit gehou is. Op die foto is Montane en Kruger ná afloop van die inhuldiging.