’n Uiters ontstellende video van die beweerde voorval is wyd op sosiale media versprei.
In die video kan gehoor word hoe die vrou huil en omstanders smeek dat die aanvaller genade aan haar betoon. Talle mense kyk toe.
Volgens sers. Frans Maponya, polisiewoordvoerder, is konst. Comfort Kubyane Molefe aangekla van aanranding en het hy reeds in die Bela-Bela-landdroshof verskyn.
Maponya het bevestig dat Molefe geskors is hangende die hofuitspraak.
Molefe is op Dinsdag 5 Januarie op borgtog van R1 000 vrygelaat en moet weer op Donderdag 28 Januarie in die hof verskyn.
- Pres. Cyril Ramaphosa het tydens sy jongste toespraak aan die nasie oor die Covid-19-pademie gesê geslagsgeweld het ’n tweede pandemie geword wat die land teister.
Geslagsgeweld is reeds sedert 2018 in die kollig en verskeie openbare veldtogte is geloods om bewusmaking hieroor te skep.
Statistieke toon egter dat voorvalle merkbaar toegeneem het sedert die nasionale inperkingsbevel in Maart verlede jaar ingetree het.
Die regering het reeds ’n noodplan opgestel om slagoffers by te staan en wette te verander sodat oortreders vinniger vasgevat kan word.
Sake van geslagsgeweld geniet ook hoë prioriteit in howe.
Witness Tiva, woordvoerder van die departement van gemeenskaplike ontwikkeling, het in ’n onlangse verklaring gesê maatskaplike werkers het tot dusver 1 013 slagoffers van geslagsgeweld in Limpopo bygestaan. Dit is net die slagoffers wat na vore gekom het en is nie ’n ware weerspieëling van wat in gemeenskappe gebeur nie, reken kenners.
Mense wat dringende hulp soek in verband met geslagsgeweld kan die departement se hulplyn skakel by tel. 0800 428 428 waarna hulle na veilige hawes vir slagoffers verwys kan word en met maatskaplike werkers in verbinding kan tree.
