![](https://images.caxton.co.za/wp-content/uploads/sites/134/2018/07/Crime-pta-Medium.jpg)
Kapt. Emsie Roux het op Woensdag 11 November tydens die Bela-Bela-polisie se plaaslike veiligheidsvergadering gesê die dorp het die afgelope tyd erg deurgeloop onder misdadigers.
Sy het gesê voorvalle van brandstigting, beskadiging van eiendom, inbrake, rooftogte, aanranding en diefstal het die plaaslike polisielede baie besig gehou. Die mans wat daarvan verdink word dat hulle onlangs die Pep-klerewinkel beroof het, is net buite Brits in Noordwes aangekeer.
Die polisie is egter nog op die spoor van die booswigte wat in Oktober die Ackermans in Chris Hanistraat beroof het, het sy gesê.
In nog ’n voorval in Chris Hanistraat, is bankkliënte voor die Capitec-bank van kontant beroof nadat hul die kitsbank gebruik het, het Roux gesê. Die polisie waarsku ook dat mense wat tot laataand by sjebeens in die township kuier, die teiken geword het van rowers.
Die mense word van hul selfone en kontant beroof wanneer hulle huiswaarts keer. Die polisie ondersoek verskeie klagtes. Voorts het Roux gesê die polisie het ’n deurbraak gemaak deur ’n verdagte aan te keer wat vermoedelik by verskeie rooftogte tussen die R516-pad en die Waterfront betrokke was.
Die man het glo voetgangers met ’n mes aangehou en hul selfone en kontant geroof. Volgens die polisie word daar ook weekliks meer sake van aanranding en huishoudelike geweld weens drankmisbruik aangemeld.
Roux het gesê die meerderheid van hierdie gevalle vind in die township plaas. Inbrake by sakepersele en wonings in die township, die industriële gebied en veral in Kretzchmar-, Flamboyant-, Van der Merwe-, Tambotie- en Moffatstraat is aangemeld.
Volgens Roux hou die diefstal van duur elektroniese toerusting verband met die toename in dwelmverbruik. Dié toestelle kan vinnig van die hand gesit word om kontant vir dwelms te bekom.
Die toename in diefstal van krag- en spoorweginfrastruktuur vir hul koperinhoud het skerp toegeneem en is landwyd ’n ernstige probleem. Volgens Roux verloor ondernemings soos Transnet, Eskom, die munisipaliteite en individue miljoene rande weens hierdie misdade.
Die gerugte dat sekere skrootwerwe gesteelde metale onwettig koop, is iets wat dringend ondersoek moet word, het sy gesê. In die geval waar onbeplande kragonderbrekings plaasvind, moet inwoners dadelik die munisipaliteit in kennis stel of navraag doen omdat dit dikwels weens kabeldiefstal is.
Kabelo Mosito, munisipale woordvoerder, het bevestig dat misdaad bydra tot foutiewe infrastruktuur en dikwels lang kragonderbrekings tot gevolg het. Kol. Pule Moselane, hoof van die Bela-Bela-polisie se sigbare polisiëringseenheid, doen ’n beroep op inwoners om misdaad sonder versuim aan te meld.