![](https://images.caxton.co.za/wp-content/uploads/sites/134/2020/11/illegal-substances-freepik.jpg)
Die Bela-Bela-polisie het op Donderdag 12 November vir Malala Legodi (54) naby Superspar in die dorp aangekeer en hom aangekla van die besit van dwelms.
Die polisie het op ’n wenk van die publiek gereageer en Legodi is met twee sakkies dagga in sy besit betrap.
Sers. Frans Maponya, polisiewoordvoerder, het aan Die Pos gesê Legodi het kos gekoop en was op pad om ’n vriend by die landdroshof te ontmoet.
Die vriend sou glo in die hof verskyn, maar dit is nie duidelik wat die aanklag was nie. Volgens Maponya is Legodi in hegtenis geneem en aangekla, maar vrygelaat nadat hy ’n skulderkenningsboete van R200 by die polisiestasie betaal het.
- Ingevolge die grondwet, wat in 2018 gewysig is, mag mense dagga vir eie gebruik verbou en in hul privaat wonings gebruik.
Daar is egter steeds baie onduidelikheid oor die hoeveelheid dagga wat in privaat besit mag wees.
Enigeen wat met dagga of enige ander onwettige dwelmmiddel in die openbaar betrap word, staar steeds vervolging in die gesig. Die verspreiding van enige dwelms is ook onwettig.