Fernando Goncalves, Modimolle, skryf:
Ek hoop die boeremark in Modimolle bly vir lank ’n instelling.
Ek wil dankie se aan die organiseerders vir ’n puik inisiatief en moedig julle aan om deur te druk en die mark ’n instelling te maak. Dit kan werk.
Wanneer laas het ons direk by die boer verwerkte vleis en wildsdroëwors en -biltong gekoop? Dit is die regte tuisverwerkte vleis met net goeie bestanddele, eiesoortige kruie en die lekkerste smaak.
Die gebruik om vars plaasprodukte soos perskes, sampioene, tamaties, wortels, blomkool, komkommer en slaai van die boer se trok af te koop, was amper iets van die verlede.
Die tuisgemaakte konfyte, koekies, beskuit en souse is keurig verpak en ’n heerlike bederf. Daar is houtwerk en naaldwerk en ander handgemaakte artikels — werklik iets in almal se smaak. Die atmosfeer is onverbeterlik.
Met die heerlike aroma van vars pannekoek en koffie word ou vriende en kennisse uit die gemeenskap gegroet terwyl bekende treffers sag in die agtergrond speel.
Ek vra ons dorp en buurdorpe se inwoners om hierdie unieke inisiatief te ondersteun en ons eie boeremark volhoubaar te maak sodat ons dit nog vir lank kan geniet.
Ondersteun jou gemeenskap en gee aan meer plaaslike talent geleentheid om hul produkte te vertoon.