![](https://images.caxton.co.za/wp-content/uploads/sites/134/2020/10/blitsige-diens-freepik.jpg)
Joanie Erasmus, Modimolle, skryf:
Ek wil dankie sê aan Amanda Scheepers en haar span van PRSS Sekuriteit vir die puik diens wat hulle lewer.
Hulle het onmiddellik gereageer toe ons hulle hulp versoek het.
Daar was op Maandag 28 September ’n voorval waar kliënte met vervalste R200-note by The Silver Wood Shack en Jagkamp betaal het.
Ek het Amanda onmiddellik geskakel toe ek besef het die geld is vervals.
Ek het ’n foto en die registrasienommer van die voertuig vir haar gestuur en Jannie du Plessis van Jagkamp het ’n foto van die verdagte aangestuur.
Die verdagtes is binne vyf minute deur die veiligheidsmaatskappy vasgetrek. Hulle het ons by die polisiestasie ontmoet en seker gemaak ons is vertroud met die prosedure om ’n saak te open. Ons dorp en gemeenskap is veiliger met PRSS wat so paraat is.
Namens Jannie du Plessis en Hugo van Zyl van Silver Wood Shack, baie dankie vir die volgehoue puik diens.