Die 2020 Nissan Trailseeker-fietswedren is die afgelope naweek by die Sondela-natuurreservaat buite Bela-Bela aangebied. Deelnemers kon aan 10 km-, 20 km-, 40 km- of 65 km-wedrenne deur die reservaat deelneem. Twee plaaslike deelnemers, Jan en Annette Pienaar, het die 20 km aangedurf. Annette het die wedren binne 01:37:29 voltooi en Jan binne 02:29:39. Annette is aangewys as algehele wenner in die ouderdomsklas: vroue bo 70. Jan was sewende in sy ouderdom.
Jan Prinsloo (83), beter bekend as Jan Das, is ’n oudleerder van Hoërskool Warmbad wat hom onderskei het as sportman en diep spore in provinsiale, nasionale en internasionale rugby getrap het. Prinsloo, wat in 1957 gematrikuleer het, kan met reg trots wees op sy Springbokbaadjie, Rhino-baadjie en Protea-baadjie wat deur South African Rugby League (SARL) aan hom toegeken is. Dié sportman, wat in 2013 die vaandel by die amptelike opening van die 21ste Wêreld Meestersatletiekkampioenskap in Brasilië gedra het, is vanjaar deur SARL as ’n legende in hul heldesaal vereer. Prinsloo is ’n inwoner van Potchefstroom.