Klagtes is die afgelope week by die Bela-Bela-polisie ingedien nadat daar glo gedreig is om die veiligheidsheining wat in die omgewing van die Tuin Tuiste-aftreeoord buite Bela-Bela opgerig word, te beskadig. Die klaer, wat verkies om anoniem te bly, het aan Die Pos gesê ’n groep inwoners, waaronder ’n hoë munisipale amptenaar, het glo gedreig om die heining te beskadig. Die Bela-Bela-munisipalteit het by navraag aan Die Pos gesê hulle ondersoek die bewerings intern. Op die foto is kontrakteurs besig om die heining op te rig. Die koste van die heining word deur privaat inwoners gefinansier nadat die nodige toestemming van die munisipaliteit ontvang is.
Jurie van Staden van Bela-Bela het op Maandag 12 Oktober sy 80ste verjaardag gevier. Sy familie het vir hom die afgelope naweek ’n spesiale geleentheid in Pretoria gereël en hom met ’n heerlike koek met die familiewapen op bederf. Van Staden en sy vrou, Bets, woon al 25 jaar in die dorp. Hy het sedert 1997 ’n ingenieursfirma in die dorp bestuur, maar moes weens gesondheidsredes aftree. Die familie is dankbaar dat hy hierdie mylpaalouderdom kon bereik. Op die foto is Van Staden by die unieke koek tydens die verjaardagviering.
Die Afrikaanse Protestante Kerk (AP-kerk) in Bela-Bela het op Saterdag 10 Oktober ’n potjiekoskompetisie by ’n kuierplek buite die dorp aangebied as deel van die kerk se fondsinsamelingsprojek. Tien spanne het ingeskryf. Groot pryse was op die spel. Die algehele potjiekoswenner was die span met Willie Claassens en Jaco de Jager wat ’n smaaklike kerriepot voorberei het. Op die foto is die span wat die beste spangees gehad het. Hulle is Keanu Odendaal, Christian Heuer, Johan Janse van Rensburg saam met ds. Pieter Malan, AP-kerkleraar tydens die prysuitdeling.
Lede van die Rhino Pride Foundation in Bela-Bela het sekelboshout gratis as ’n liefdadigheidsveldtog aan inwoners van die plaaslike gemeenskap beskikbaar gestel. Die skenking het verskeie gesinne in staat gestel om kos op die tafel te plaas. Op die foto is DA-raadslid Frans Mothokwa wat gehelp het om die hout aan behoeftige gesinne te versprei by dr. Jana Pretorius, veearts en stigter van die Rhino Pride Foundation, en Rachel Masemola, DA-raadslid.
Inwoners van Bela-Bela het die afgelope week verskeie plakkate by openbare plekke gesien wat aandui dat dié omgewing ’n brandpunt (“hotspot”) vir die Covid-19-virus is. Kabelo Mosito, munisipale woordvoerder, het egter by navraag aan Die Pos gesê die plakkate word oral in die land opgesit om mense daaraan te herinner om steeds by die voorsorgmaatreëls te hou. Hier staan hy by die plakkaat wat by die hoofgebou van die Bela-Bela-munisipaliteit aangebring is.
Warmpatat: ’n Vervoerkontrakteur wat op Woensdag 7 Oktober ’n duur helikopter vervoer het, het groot teëspoed beleef toe die sleepwa met die kosbare vrag by die sirkel in Chris Hanistraat in Bela-Bela omgeslaan en die helikopter beskadig is. Die helikopter was na verneem word bestem vir ’n kliënt in die wildbedryf. Geen ander voertuig was in die ongeluk betrokke nie. Volgens die polisie is geen ongeluksverslag geopen nie en die toneel is vinnig opgeruim en die pad weer vir die druk naweekverkeer oopgestel.