![](https://images.caxton.co.za/wp-content/uploads/sites/134/2020/10/klerewinkel-roof-freepik-626x470.jpg)
Twee ander winkels in Chris Hanistraat — Ackermans en Markham — het ook in September onder rowers deurgeloop.
Volgens kol. Abel Phetla, Bela-Bela-polisiestasiebevelvoerder, het vier gemaskerde mans die Dunns-winkel op Woensdag 30 September beroof.
Een verdagte het aanvanklik alleen die winkel betree en R12 se selfoonlugtyd gekoop. Die ander drie het daarna ingekom.
Een van die vier verdagtes het by die deur die handontsmettingsmiddel van ’n personeellid geneem en kliënte, sonder om verdag voor te kom, vriendelik weggewys, het Phetla gesê. Slegs een handwapen was sigbaar, maar dit is nooit op iemand gerig nie.
Die winkelbestuurder en ’n ander personeellid is na die agterkant van die winkel gedwing en daar aangehou.
Die rowers het met die kontant wat in die kasregister was en ’n onbekende hoeveelheid selfone op die vlug geslaan, het Phetla gesê. Die veiligheidskameras se beeldmateriaal was volgens hom tot dusver nie van veel hulp om die verdagtes te identifiseer nie.
Die winkel het na verneem word slegs enkele dae tevore selfone ontvang.
“Ons sal voortgaan om sigbare polisiëring in die omgewing te verbeter,” het Phetla gesê.
Hy maan sakelui om gereeld veiligheidskameras na te gaan en op te dateer. Beeldmateriaal met goeie resolusiekameras kan help om verdagtes uit te wys en tot suksesvolle inhegtenisnemings lei, het hy gesê.
- Die Bela-Bela-munisipaliteit het in hul finale geïntegreerde ontwikkelingsplan (GOP) ’n begroting beskikbaar gestel vir die koop en installering van veiligheidskameras in die dorp se sentrale sakesektor.
Volgens beskikbare dokumente is daar R2,5 miljoen vir die kameras begroot.
Hoewel dié projek reeds meer as ’n jaar gelede bespreek is, is daar nog geen aanduiding dat daar vorderding daarmee is nie. Die Pos het navrae aan Kabelo Mosito, munisipale woordvoerder, gestuur oor die beoogde datum van voltooiing van die projek, maar het teen druktyd geen terugvoer ontvang nie.