![](https://images.caxton.co.za/wp-content/uploads/sites/134/2020/10/boere-paraat-freepik.jpg)
Christo Venter, voorsitter van die Vaalwater-GPF, het aan Die Pos gesê inwoners moet weer na hul veiligheidsmaatreëls kyk en dit verbeter waar nodig.
“Maak seker dat daar diefwering voor vensters is en genoeg ligte buite is om die erf te verlig. Maak seker daar is goeie veiligheidshekke in die huis. Indien daar iets verdags buite is, moenie self uitgaan nie. Kontak die bure of een van die veiligheidsgroepe sodat iemand van buite af kom kyk. Moenie uit jou huis gelok word nie,” het hy gesê.
Die moord op die 21-jarige Brendin Horner naby Paul Roux in die Oos-Vrystaat het vandeesweek groot opslae gemaak toe boere opgeruk het om die hofverskyning van die twee verdagtes by te woon. Gemoedere het hoog geloop en ’n polisievoertuig wat omgekeer is het begin brand. Daar het ook enkele skote geklap.
Horner is vermoedelik by ’n plaashek oorval nadat hy op Donderdag 1 Oktober net ná 19:00 vanaf die buurplaas teruggery het huis toe.
Familie en vriende het deur die nag na hom gesoek nadat hy nie by die huis opgedaag het nie.
Sy liggaam is die volgende oggend gevind waar hy aan ’n paal vasgemaak was. Twee mans is in hegtenis geneem.