Die Covid-19-inperkings het talle nuwe uitdagings gebring, maar nogtans het twee junior RiVo-dramastudente besonder goed presteer op nasionale vlak.
Marianey du Plessis (gr. RR) het ’n derde plek behaal in die Dramaweb SA se nasionale dramakompetisie.
Sy het in die afdeling vir gr. RR tot gr. 1 deelgeneem. Odelea van der Nest (gr. 2) het ná haar onlangse deelname aan die finale ronde van die landwye digitale Radikale-redenaarskompetisie ook in die derde plek geëindig.
Rita Volschenk, afrigter van RiVo-toneelgroep, het aan Die Pos gesê hulle sien met afwagting uit na die uitslae van die Op-die-planke-monoloogfees.
Nie minder nie as 23 RiVo-dramastudente het gekwalifiseer vir die finale beoordeling van dié fees.
