’n Groep DA-lede het op Saterdag 3 Oktober die openbareparkie in Reitzstraat in Bela-Bela opgeruim nadat inwoners maande lank gekla het oor die agteruitgang van die parkie. ’n Petisie is vroeër aan die Bela-Bela-munisipaliteit en die polisie oorhandig om hulle te dwing om dringend aandag aan die toestande by die parkie te gee. Die plaaslike DA-tak, in samewerking met Desirée van der Walt (LP), het die skoonmaakprojek georganiseer. Inwoners het hul dank teenoor die organiseerders uitgespreek en gesê daar is ’n merkbare verskil. Op die foto staan Tinus Ras, DA-raadslid van wyk 1 saam met Rachel Masemola en David Senosha, proporsionele DA-raadslede.
Die NG-Moedergemeente in Bela-Bela nooi inwoners om op Saterdag 17 Oktober heerlik saam te kuier met die dinamiese gasspreker Lindie Strydom (van Eeden). Die verrigtinge begin om 09:30 en word in die kerksaal in Mentzlaan aangebied. Kaartjies kos R100 per persoon en sluit ’n heerlike ontbyt in. Bespreek by Patrys by tel. (014) 736 2788. Covid-19-veiligheidsmaatreëls sal gehandhaaf word. Foto: listennotes.com
Inwoners van Bela-Bela se oë het op Maandag 5 Oktober gerek toe die polisie voor Pieter Wagner-eiendomme in Chris Hanistraat ’n voertuig van die pad getrek het en dit gelyk het asof die insittendes in hegtenis geneem word. Inwoners is op hul hoede nadat verskeie rooftogte die afgelope paar weke by sakepersele in die sentrale sakesektor aangmeld is. Die Pos is ingelig dat die jongste optrede deur die Northam-polisie uitgevoer is. Die betrokke beamptes het na bewering leidrade opgevolg wat verband hou met ’n rooftog in die Northam-gebied. ’n Woordvoerder van die Northam-polisie het aan Die Pos gesê die insittendes is slegs ondervra en daarna weer vrygelaat. Foto: Verskaf
TLU SA se Noordstreek het einde September tydens die TLU-jaarkongres afskeid geneem van Louis Meintjes, wat die afgelope nege jaar president van TLU SA was. Hy word opgevolg deur Henry Geldenhuys wat voor die kongres as adjunkpresident opgetree het. Meintjes het sedert 1989 diep spore in die boeregemeenskap getrap en boer nog in die Cullinan-omgewing. Hy is op die kongres vir sy dinamiese leierskap vereer. Op die foto is Henk van de Graaf (regs), huidige voorsitter van die Waterberg DLU en nuutverkose voorsitter van TLU SA Limpopo. Hy oorhandig ’n oorkonde aan Meintjes (links). Erika Meintjies is in die agtergrond.