Die Markham-klerewinkel het op Vrydag 25 September helderoordag deurgeloop.
Die Ackermans-klerewinkel in dieselfde straat is op Woensdag 16 September beroof.
Sers. Frans Maponya, polisiewoordvoerder, het by navraag gesê die Markham-rooftog het ongeveer 09:16 die oggend plaasgevind.
Vier verdagtes het die winkel betree, maar slegs een het ’n sigbare handwapen by hom gehad. Die rowers het die handontsmettingsmiddel by die bestuurder afgeneem en hom saam met die kassier na die agterkant van die winkel gedwing.
“Die rower het nie die handwapen op iemand gerig nie, maar die personeel het hul volle samewerking gegee. Die rowers het egter ’n bloutjie geloop omdat die winkel nie meer selfone in voorraad gehad het nie en die kontantbedrag in die kasregister maar klein was. Die rowers het hulself gehelp aan ’n klompie T-hemde voordat hulle op die vlug geslaan het,” het Maponya gesê.
“Die twee personeellede is in ’n badkamer toegemaak en het eers na vore gekom toe ’n kliënt die winkel binnegestap en na die personeel geroep het.
Dit is onbekend op watter manier die rowers gevlug het. Die modus operandi was baie dieselfde as die voorval vroeër by Ackermans, het Maponya gesê.
ADVERTENSIE/ADVERTISEMENT
Nog geen verdagtes is aangekeer in verband met die rooftogte nie.
Maponya het gesê rooftogte neem beslis toe en dat die polisie se misdaadvoorkomingseenheidspan, in samewerking met die gemeenskappolisiëringsforum, sigbaarheid in die strate sal verhoog.
Baie dankie aan Hide Away sonder wie se hulp die plasing van dié aanlynberig nie moontlik sou wees nie.
