Stefan Muller (32) is op Maandag 15 September tot 24 maande tronkstraf gevonnis wat opgeskort is vir vier jaar, het AO James Findlay, woordvoerder van die Modimolle-polisie, gesê. Muller het al die klaers terugbetaal wat in sy guns getel het.
Die klagtes teen hom, wat van regoor die land ingestroom het, het gevolg nadat ’n woedende boervrou van die Oos-Kaap haar in Februarie tot sosiale media gewend het.
Sy het glo ’n deposito van R42 000 betaal waarna Muller verdwyn het.
“Ek sal nie ophou voordat ek my geld terug het of totdat iemand agter tralies is nie,” het sy gesê.
Talle mense het op haar plasing gereageer en inligting oor waar Muller in Brits gewerk het, gegee. Sy en haar man het hom by sy werkplek ingewag en na die plaaslike polisiestasie geneem. Muller het egter voor die polisiestasie ontsnap.
Muller is uiteindelik in Maart vanjaar in Shelly Beach, KwaZulu-Natal, deur AO Ross Rossouw en sers. Amanda Rossouw van die Modimolle-polisie aangekeer.
Hulle was op sy spoor in verband met verskeie bedrogklagtes wat tussen 2011 en 2019 plaasgevind het, het Findlay gesê.
- Die 24-jarige Lenn Roy Jofner wat in April by ’n motorbandehandelaar in Modimolle aangekeer is, verskyn weer op Maandag 12 Oktober in die streekshof in die dorp.
Die tien klagtes teen hom wissel van bedrog, diefstal, besit van vervalste geld, dwelmhandel, besit van vermoedelik gesteelde eiendom en vervalsing.
Jofner is aangekeer nadat hy glo duisende rande se motorbande wou koop.
Hy het kort tevore glo by ’n vulstasie in die dorp brandstof ingegooi, maar nie daarvoor betaal nie.
Die polisie het tydens sy inhegtenisname glo afgekom op vervalste diamante en R200-note, juwele en metamfetamien, beter bekend as “crystal meth”.
