![](https://images.caxton.co.za/wp-content/uploads/sites/134/2020/09/goeie-werk-freepik.jpg)
Piet Pretorius, wykskomiteelid: wyk 12, Modimolle, skryf:
Ek wil graag inligting gee na aanleiding van onlangse briefwisseling in Die Pos oor die toegewydheid en prestasies van wykraadslede en wykskomiteelede. Dit blyk dat briefskrywers nie altyd verstaan wat dit verg om die gevolge van ’n wanfunksionele munisipaliteit se knoeiwerk reg te ruk nie.
Daar word nie voldoende erkenning gegee aan wykraadslid Sarna Groenewald en haar span vir hul ongelooflike groot bydrae tydens die onlangse moeilike tye nie.
Die span, wat die burgemeester insluit, het gedurende die grendeltyd ’n belangrike rol gespeel om saam met ander organisasies kos aan behoeftiges te voorsien.
’n Spesiale dankie aan Janine Erasmus (wykskomiteelid in wyk 12) wat haar sakeperseel daarvoor beskikbaar gestel het. Watertenkwaens is tydens watertekorte gereël en deur die wyksraadslid en die komitee gekoördineer. Die span het moeite gedoen om te verseker dat inwoners water kry.
Ek is ook gefrustreerd met van die dinge in die dorp en wyk 12 wat nie na wense is nie. Dit gaan egter my verstand te bowe dat diegene wat poog om dit wat verkeerd is reg te stel, nou aangeval en gekritisieer word. My ervaring is dat die burgemeester en wyksraadslid van wyk 12 altyd bereid is om te help.
Die eerste voorbeeld hiervan is uitstekende kommunikasie. Wyk 12 het elke tweede maand wykskomiteevergaderings waar probleme bespreek word. Tweedens het die wyksraadslid verskeie Whatsapp-groepe wat sy gebruik om inligting te deel. Derdens is daar gereelde wyksraadsvergaderings wat by die Koro Creek-gholflandgoed gehou word waar die burgemeester terugvoer gee. Weens die grendeltydperk was daar nie die afgelope ses maande vergaderings nie. Vierdens hou wykskomiteelede ook inwoners op hoogte en los hul probleme, waar moontlik, op.
Wat daaglikse dienslewering betref word probleme onmiddellik ondersoek en aksieplanne in werking gestel. Dit gebeur egter gereeld dat beloftes wat deur munisipale amptenare gemaak word, nie nagekom word nie of sonder enige kommunikasie verander word.
Die gemeenskap sien dit ongelukkig as swak prestasie aan die kant van die raadslid en haar span. Dit is beslis nie die geval nie.
Nog ’n uitdaging is die waarde van eiendomme in Bosveldsig. Die formule om die waarde van eiendomme vir munisipale doeleindes te bereken, is in samewerking met waardeerders gestandardiseer. Dit is gedoen om foute van die verlede reg te stel en te verseker dat die eiendomsbelasting wat betaal word, regverdig bereken is.
Die gemeenskap waardeer die toegewydheid en werk wat Groenwald en haar span doen in baie moeilike omstandighede. Ek ys as ek dink wat kon gebeur het en hoe die dorp sou gelyk het as daar nie vier jaar gelede reeds begin is met verandering in die munisipaliteit nie.
Kyk maar net hoe gaan dit in ander dorpe in die land. Ek kan die gemeenskap verseker dat die burgemeester en haar span toegewyd is.
Dit is maklik om te kla oor dit wat nie reg is nie en te “vergeet” van die positiewe uitkomste.
Die onregverdige kritiek sal ons egter nie van stryk bring nie en ons sal voortgaan met ons mandaat. Dit is nie nou die tyd om verdeeldheid te saai nie.
Kom ons hou ons verwagtinge hoog, ons uitkyk realisties en ondersteun die burgemeester, die wyksraadslid en haar span.