Medaljes rol in vir Kokanje-atlete
Die drie atlete van die Kokanje-aftreeoord, buite Modimolle, wat verlede week aan ’n wêreldwye virtuele sportbyeenkoms deelgeneem het, het uitstekend presteer.
![](https://images.caxton.co.za/wp-content/uploads/sites/134/2020/08/12a-1.jpg)
Annette van Dyk, Ria Ludick en Babsie Crafford (Grobler) het op Saterdag 1 Augustus aan hierdie byeenkoms van Central Gauteng Athletics (CGA) op hul eie baan, wat by die aftreeoord ingerig is, deelgeneem.
Die uitslae van hul pogings, asook video’s, is na CGA in Germiston gestuur en die wenners is op Woensdag 5 Augustus bekend gemaak. Atlete uit 25 lande het deelgeneem.
Van Dyk, wat deelgeneem het in die kategorie vir vroue van 65 tot 69 jaar, het ’n silwer medalje in gewigstoot verower. Sy het ’n persoonlike beste afstand opgestel met haar stoot van 7,33 m. Sy het ook ’n silwer medalje vir werpskyf verower met ’n afstand van 15,67 m.
Ludick, wat deelgeneem het in die kategorie vir vroue van 70 tot 74 jaar, het goud verwerf met haar afstand van 7 m in gewigstoot.
Dit was ook ’n persoonlike beste afstand. Sy het ook goud verwerf vir werpskyf met ’n afstand van 16,65 m. Crafford het deelgeneem in die kategorie vir vroue van 75 tot 79 jaar en het silwer gekry vir gewigstoot met ’n afstand van 5,25 m en goud vir haar werpskyf-afstand van 14,12 m.
Al drie atlete het Gauteng-Noord standaarde behaal. Die drie atlete het sedert Januarie twee tot drie keer per week geoefen om vir die kompetisie voor te berei.