VROUE in sake: Sy laat droomtroues gebeur
“Ek dink in hierdie bedryf is dit voordelig dat ek ’n vrou is. Vroue het ’n fyner aanvoeling en kan mense ‘lees’.”
Die stofpaadjie kronkel deur Bosveldbome op die Springbokvlakte tot waar ’n groen lushof met houtdekke oor water opdoem: die Tsekama-onthaalplek. ’n Liefling van bruide regoor die land.
Dié gewilde keuse vir paartjies wat die knoop wil deurhaak is maande vooruit bespreek.
Tsekama is onbepland in 2003 gebore, vertel eienaar Marinda Turvey.
“Ons het vir ons ’n naweekplekkie met ’n lapa en twee chalets op die plaas waar my man, Willie, boer opgerig. Vriende van ons wou daar trou en daarna het ons nog navrae ontvang. Ons het later besluit om die lapa te vergroot en nog kamers aan te bou.”
Dis Turvey se behendige hand en kunstenaarsaanvoeling wat die sprankel byvoeg. Hiervoor is sy goed gekwalifiseer met ’n graad in kuns- en ontwerp en hande wat nooit stil is nie. Dit is vir haar tweede natuur om dinge mooi te maak.
Die uitdagings wat die Covid-19-pandemie gebring het, het ook hierdie bedryf hard getref. Die laaste troue kon in Maart op die nippertjie deurgehaak word, maar 36 ander troues moes uitgestel word na aanstaande jaar.
“Ek het die bruide bitter jammer gekry,” het Turvey gesê.
Ook jagters wat verblyf bespreek het, moes kanselleer nadat regulasies verander het.
“Dit is bitter moeilike tye en ons moes moeilike besluite maak. Die basiese onkoste om Tsekama te onderhou, is sowat R100 000 per maand. Dit sluit die elektrisiteitsrekening, lone en versekering in. Die werkloosheidsversekering het vir slegs vier van ons 14 personeellede uitbetaal,” het Turvey gesê. “Ons sien uit daarna om so gou moontlik weer aan die gang te kom wanneer die regulasies dit toelaat.”
Die troubedryf is nie ’n maklike een nie en Turvey dra vele hoede: sakevrou, sjef, beplanner, blommerangskikker, asook berader vir gespanne bruide en hul moeders.
“Ons moet op ons voete dink, want dinge verloop nie altyd soos wat mense beplan nie,” lag sy en vertel van natgereënde bruide wie se hare inderhaas oorgedoen word en trourokslepe wat blitsig gewas word terwyl die gaste vir die reën vlug. Turvey sê haar werknemers is vir haar baie belangrik. “Hulle is almal al lank by my en verstaan wat gedoen moet word.”
Sukses in dié soort onderneming gaan saam met fyn en deeglike beplanning, glo sy.
“Ons ondersteun plaaslike ondernemings, maar kry sekere van ons benodigdhede in die stad. Ons gaan doen op Donderdae aankope, op Vrydae doen ons die blomme en dekor en Saterdae word die kos gemaak sodat dit vars voorgesit kan word. Ons kan nie bekostig om iets in die stad te vergeet wat nie plaaslik beskikbaar is nie.”
’n Goeie verhouding met betroubare verskaffers is baie belangrik.
Om ’n bruid se droom in realiteit te omskep, is ’n talent.
“Ek dink in hierdie bedryf is dit voordelig dat ek ’n vrou is. Vroue het ’n fyner aanvoeling en kan mense ‘lees’. Ek wil hê die bruidspare moet tuis voel en as hulle weggaan, soos familie wees,” het sy gesê.
Turvey se raad aan sakelui is om nie haastig te wees om ’n bestuurder aan te stel nie. “Doen die werk self. Ander mense het nie dieselfde passie vir jou projek nie.”
WATTER VOORDEEL HET VROUE BO MANS IN DIE SAKEWÊRELD?
Die sakewêreld is nie aldag ’n maklike plek om te navigeer nie en sakelui moet hul staal wys om te oorleef. Die Pos het by ’n paar sakevroue in Modimolle aangeklop.
“’n Vrou in die kantoor is van onskatbare waarde. Vroue kan kliënte met meer empatie help as die meeste mans. Ons laat ’n kliënt voel dat hy belangrik is van die oomblik wat hy instap totdat hy tevrede met die diens weer wegstap.”
“Vroue bied ’n ander perspektief en manier om met mense te werk en te bestuur omdat hulle gewoonlik meer geduld en empatie het en meer gemeenskaplik is.”
“Ek het ’n voordeel in my beroep omdat ek weet wat ’n vrou van ’n huis verwag wanneer sy een wil koop.”
“Vroue se vermoë om meer as een taak tegerlykertyd aan te pak gee hulle ’n voordeel. Hulle is ook vasberade en het deursettingsvermoë.”
