![](https://images.caxton.co.za/wp-content/uploads/sites/134/2020/06/man-in-hof-freepik.jpg)
Lenn Roy Jofner (24) het sy rieme styfgeloop nadat hy glo nie vir brandstof by ’n plaaslike vulstasie betaal het nie. Hy is later herken toe hy by ’n motorbande-onderneming in die dorp wou sake doen en is daar in hegtenis geneem. Volgens die polisie het hulle ook dwelms en vervalste diamante in sy besit gevind.
Jofner, wat in Groblersdal woon, word verbind met sake in Dennilton, Groblersdal, Motetema, Vaalwater, Mookgophong, Laersdrift en Hercules in Pretoria. Hy was ten tyde van sy in hegtenisname uit op borgtog vir ’n ander saak in Mokopane. Volgens die polisie word sewe ander sake van bedrog teen hom ondersoek.
Die klagtes wat spruit uit sy in hegtenisname in Modimolle wissel van bedrog, diefstal, die besit van vervalste geld, dwelmhandel, besit van vermoedelik gesteelde eiendom en vervalsing nadat die polisie glo vervalste diamante en R200-note, juwele en metamfetamien, beter bekend as “crystal meth”, by hom gevind het, het brig. Matlafela Mojapelo, provinsiale polisie-woordvoerder, gesê.
Jofner het reeds vlugtig in die hof in Modimolle verskyn, waarna sy saak uitgestel is tot Dinsdag 11 Augustus. Al die sake wat in Limpopo ondersoek word, sal saamgevoeg word, het AO James Findlay, woordvoerder van die Modimolle-polisie, aan Die Pos gesê.
Jofner bly in aanhouding.