AO James Findlay, woordvoerder van die Modimolle-polisie, het egter aan Die Pos gesê die misdaadsyfers is tans redelik laag. “Ons ervaar elke winter ’n toename in inbrake by vakansieoorde en onbewoonde huise waar komberse en toerusting gesteel word. Dit gebeur dikwels in eenhede wat afgesonder is of waar daar nie baie beweging is nie,” het hy gesê.
Hy het gesê die polisie het ook nie ’n beduidende toename in oortredings ervaar sedert die drankverbod gelig is nie, hoewel sommige ander dele van die land groot probleme daarmee ervaar het.
“Daar was by ons gevalle van dronkbestuur tydens vlak 5 van die inperking, maar nie ’n toename sedert ons op vlak 3 is nie.”
Hy het die laer misdaadsyfers gedeeltelik daaraan toegeskryf dat kroeë en sjebiens nie mag handel dryf nie en hul klante dus nie onder die invloed van drank van daar af huis toe stap nie.
“Ons hoop van harte dat die misdaadsyfers so laag bly,” het hy gesê.
