Bosveldvoëlklub vier 25ste bestaansjaar
Die Bosveldvoëlklub vier in Junie hul 25ste bestaansjaar, maar sal weens die grendelstaat die feesvieringe vir eers moet uitstel.
![](https://images.caxton.co.za/wp-content/uploads/sites/134/2020/06/10a.jpg)
“Covid-19 het ongelukkig ’n stok in die speke gedruk, want ons het ’n groot makietie vir Julie beplan, maar ons sal geduldig wag en die verjaardag later vier,” het Jan van Biljon, klubvoorsitter, aan Die Pos gesê.
Alle klubaktiwiteite is gekanselleer, maar die bestuur werk reeds volstoom aan ’n klubprogram vir 2021.
Die klub is in 1995 gestig en hul grondwet is teen Junie dieselfde jaar goedgekeur.
Daar het aanvanklik ’n paradysvlieëvanger op die klub se embleem verskyn, wat in 2000 met ’n Bosveldvisvanger vervang is, het hy vertel.
“Daar was aanvanklik net 11 lede in die klub. Die eerste voorsitter was Freddie Smith en dr. Mich Veldman van Modimolle is as erepresident verkies. Die klub het in die jare wat gevolg het, onder die voorsitterskap van Leon en Riko Snyders en hul bestuurspan, gedy. Daar is tans meer as 100 lede.”
Die klub het tussen hul voëlkykuitstappies ook projekte aangepak en in 2001 is ’n voëlkykskuiling in Modimolle gebou. Die ryk voëllewe in die vleiland tussen die Nylrivier en Modimolle se industriële gebied het lede weekliks gelok.
Van Biljon het gesê voëlkykers het in 2004 van heinde en ver gekom om die verskeidenheid watervoëls te besigtig omdat die riviere toe baie vol was.
Die lede het hard gewerk om ’n plek vir voëlkykers in te rig en dit is die Modimolle Bird Sanctuary gedoop. Weens die misdaadgevaar het dié projek ongelukkig doodgeloop, het Van Biljon gesê.
Klublede was nogtans baie aktief en het gereelde byeenkomste gehou waar kenners aanbiedings en lesings oor voëls gelewer het, het hy gesê. Daar is verskeie daguitstappies gereël en ook voëlkampe.
Die klub spog ook met hul kwartaallikse uitgawe, Die Penneveer, wat deur klublid Christine Rossouw behartig word. Dié uitgawe is propvol artikels en foto’s wat deur lede en kenners saamgestel word.
Volgens Van Biljon neem die klub ook deel aan die jaarlikse sensus van die Bosveldvoëls in Nylsvley.
“Ons lewer ook ’n bydrae tot die somer- en winterwatervoëltellingprojek (CWAC) van die Universiteit van Kaapstad. Verder is van ons lede betrokke by Birding Big Day van Birdlife South Africa en die Suid-Afrikaanse Voëlatlasprojek (SABAP2).”
“Ons gebruiklike sop-en-sjerrieaand in die winter is ’n hoogtepunt op die kalender, maar vanjaar moes dit ongelukkig in die slag bly.”
Vir meer inligting oor die klub of om aan te sluit, bel vir Van Biljon by tel. 082 822 6435 of vir Gerhard Vosloo, klubsekretaris, by tel. 084 550 1651.