Mmakwena Morris Maripa word daarvan aangekla dat hy die 73-jarige Trudie Grebe verlede jaar op Vrydag 23 Augustus vermoor het nadat hy haar vroegoggend in haar tuin oorval het. Hy het vroeër vir die Grebe-egpaar tuinwerk gedoen.
AO James Findlay, woordvoerder van die Modimolle-polisie het bevestig dat Maripa se saak aanstaande jaar van 2 tot 6 Augustus in die hooggeregshof in Polokwane aangehoor sal word.
Die moord in die stil woonbuurt het groot opslae veroorsaak. Grebe was ’n bekende diereliefhebber op die dorp. ’n Kliënt wat haar hond gebring het om deur Grebe geskeer te word het onraad vermoed toe sy ’n vreemde man die erf sien verlaat het. Grebe se verswakte man, Dolf, was ten tyde van die voorval tuis, maar het niks verdags opgemerk nie.
Maripa is op Maandag 2 September in Witpoort buite Lephalale vasgetrek waar hy in sy suster se huis geskuil het.