Volgens AO. James Findlay, woordvoerder van die Modimolle-polisie, het personeellede kort ná 06:00 besef iets skort. Die inbrekers het deur die loop van die nag 12 deure oopgemaak en uit elke kamer ’n televisiestel gesteel.
“Ons weet nie hoe hulle die deure oopgemaak het nie, maar daar is 12 televisiestelle met die afstandbeheertoestelle weg,” het hy gesê.
Die geraamde waarde is sowat R60 000.
Volgens Findlay is dit die eerste groot inbraak sedert die grendeltyd se begin op Vrydag 27 Maart. “Daar vind steeds van tyd tot tyd huisbrake en ander kleiner inbrake plaas,” het hy gesê.
- Lenn Roy Jovner (24), wat op Woensdag 29 April in die Supa Quick in Modimolle in hegtenis geneem is op aanklagte van bedrog, diefstal, die besit van vervalste geld, dwelmhandel, die besit van vermoedelik gesteelde eiendom en die vervalsing van geld, se aansoek is op Dinsdag 12 Mei aangehoor. Borgtog is nie toegestaan nie en Jofner moet weer op Dinsdag 2 Junie in die hof in Modimolle verskyn. Hy is aangekeer nadat hy glo versuim het om vir brandstof by ’n vulstasie in die dorp te betaal. Die polisie het volgens Findlay vervalste diamante en R200-note, juwele en metamfetamien (“crystal meth”) in sy besit gevind. Soortgelyke aanklagte word in die Vaalwater- en Laersdrift-omgewings teen Jovner ondersoek.
