![](https://images.caxton.co.za/wp-content/uploads/sites/134/2020/03/huis-aanval.jpg)
Marcelle Maritz, Vryheidsfront Plus, provinsiale leier: Limpopo, skryf:
Die jongste plaasaanval en -moord naby Mookgopong, Limpopo, is ’n duidelike bewys dat dié soort misdaad tot ’n prioriteitsmisdaad verklaar en as sulks hanteer moet word.
Alwyn van Zyl (79) en sy vrou, René, is in die vroeë oggendure deur aanvallers in hul huis oorval. Van Zyl is vasgebind en verwurg. Sy vrou het ligte beserings opgedoen en is uiters getraumatiseerd.
Drie van die aanvallers is vasgetrek terwyl die ander een nog op vrye voet is.
Die VF Plus bedank die misdaadbekampingsorganisasie, Heritage Protection Group (HPG) en die polisie vir hul vinnige optrede en spreek die hoop uit dat die ander voortvlugtige binnekort vasgetrek sal word.
Die VF Plus sal aanhou veg vir ’n noodsaaklike spesiale landelike beveiligingseenheid wat hom toespits op die voorkoming van plaasaanvalle en in samewerking met boere en ander veiligheidsforums werk om hierdie soort misdaad te bekamp.
Die VF Plus spreek sy meegevoel uit met Van Zyl se vrou, René, sy familie en naasbestaandes en wens René ’n spoedige herstel toe.