Die oorweldigende reuk van dagga het op Vrydag 6 Maart in die lug gehang by die Bela-Bela-polisie se store nadat die polisie op 68 daggaplante in Uitbreiding 9 in die Bela-Bela-township beslag gelê het.
Agt verdagtes wat by die kweek van die plante betrokke was, is in hegtenis geneem, het sers. Frans Maponya, polisiewoordvoerder gesê.
Die polisie het die vorige week in die Hlalampya-uitbreiding op 36 daggaplante beslag gelê en ’n 42-jarige man in hegtenis geneem.
In albei gevalle is die verdagtes daarvan beskuldig dat hulle onwettig dagga gekweek het en is hulle die geleentheid gebied om skulderkenningsboetes te betaal.
Maponya het gesê die groep van agt verdagtes het boetes van tussen R150 en R500 elk betaal en is daarna vrygelaat.
Die polisie staan ure se tyd en hulpbronne aan soortgelyke operasies af in afwagting van die parlement se wetgewing oor die presiese voorskrifte vir die verbou en gebruik van dagga. Die grondwethof het in 2018 bevind dat dagga in privaat besit mag wees en vir privaat gebruik gekweek mag word.
Die verkoop van dagga bly steeds ’n misdaad en die polisie moet bepaal of ’n gebruiker in hegtenis geneem moet word of nie, het die uitspraak bepaal.
Maponya het gesê die hoeveelheid dagga waarop in dié twee gevalle beslag gelê is, was heel waarskynlik nie net vir persoonlike gebruik nie, maar vir die verkoop of verspreiding van dagga.
Hoewel die polisie nog kopkrap oor die wettige hoeveelheid dagga, het ’n topoffisier vroeër genoem ’n riglyn is vyf 20-gram daggasakkies per persoon en ongeveer vyf plante in ’n erf. Die parlement sal hopelik teen September uitsluitsel hieroor gee.
