Die Bela-Bela-polisie het op Donderdag 27 Februarie ’n 42-jarige man in die Hlalampya-uitbreiding in die Bela-Bela township in hegtenis geneem toe hulle op 36 daggaplante in sy erf afgekom het.
Die waarde van die dagga word geraam op ongeveer R3 000, het brig. Motlafela Mojapelo, provinsiale polisiewoordvoerder, gesê. Die man is daarvan aangekla dat hy die dagga onwettig verbou het.
Sers. Frans Maponya, Bela-Bela-polisiewoordvoerder, het gesê die hoeveelheid dagga wat gevind is, maak dit onwaarskynlik dat dit slegs vir persoonlike gebruik aangewend sou word.
Die verdagte sal na verwagting op Donderdag 26 Maart in die hof verskyn, maar is die kans gegun om ’n skulderkenningsboete te betaal, het Maponya gesê.
- Regter Raymond Zondo het in September 2018 die parlement 24 maande tyd gegun om die wet te verander. Daar sal waarskynlik voor September vanjaar duidelikheid gegee kan word oor die wettige hoeveelhede wat daggagebruikers in hul privaat besit mag hê.Mense wat met dagga in die openbaar betrap word, kan summier in hegtenis geneem word, het die polisie vroeër gesê.