Marcelle Maritz, Vryheidsfront Plus (VF Plus), LPW en provinsiale leier: Limpopo, skryf:
Die VF Plus het tydens ’n vergadering van Limpopo se wetgewerskomitee vir landbou sy kommer uitgespreek oor die doeltreffendheid van die maatreëls vir die bekamping van bek-en-klouseer in die provinsie.
Die party het ook ’n dringende vergadering aangevra met Nanda Ndalane, LUR vir landbou, om dié situasie te bespreek.
Hoewel die VF Plus dit verwelkom dat Thoko Didiza, minister van landbou, die verbod op veeveilings gelig het, is die party bekommerd dat daar nie voldoende voorkomende maatreëls in Limpopo is om die verspreiding en ’n verdere uitbreking van bek-en-klouseer te voorkom nie.
’n Groot kopseer is die tekort aan staatsveeartse en die VF Plus eis dat die departement van landbou so gou moontlik veeartse aanstel en die stelsel verbeter. Die departement moet ook seker maak dat die land se rooi sones en landsgrense beveilig word om te voorkom dat besmette diere met gesonde diere in aanraking kom. Die tekort aan ’n doeltreffende spuitstof en die aanwending van die beskikbare entstof is ook uiters sorgwekkend.
Die VF Plus doen ’n beroep op veeboere (kommersieel, opkomend en kleinskaal) in die provinsie om self verantwoordelikheid te neem en toe te sien dat hul vee gereeld ondersoek word vir die siekte, ingeënt word soos voorgeskryf deur die departement van landbou en om die nodige gesondheidsklarings te bekom voor veeveilings.
Rooivleisprodusente het ontstettende finansiële verliese gely ná die verbod op die vervoer van vee en veeveilings. Die party wil toesien dat boere nie onder meer finansiële druk geplaas word weens nog ’n uitbreking van bek-en-klouseer nie.
