Warmpatat: ’n Ywerige tuinier van Modimolle wat sy tuinvullis in ’n geel houer in die nywerheidsgebied gestort het, het die sake-eienaar wat dié houer gehuur het, warm onder die kraag. Die sake-eienaar is ontsteld omdat inwoners gereeld hul huis- en tuinvullis in dié houer en ook in die veld stort, eerder as om stortingsterrein toe te ry.
Daan en Esther Gravett, bekende inwoners van Bela-Bela, gaan die Sonskyndorp eersdaags ná 28 jaar vir ’n nuwe lewe in Sasolburg verruil. Die egpaar het in Tzaneen, Walvisbaai, Phalaborwa en Winterton gewoon voordat hulle na Bela-Bela verhuis het. Die egpaar was veral ywerige gholfspelers. Hulle bedank al hul Bosveld-vriende wat hulle deur die jare bygestaan het. Daan en Esther vier ook aanstaande maand hul 61ste huweliksherdenking. Op die foto is Daan en Esther, met agter hulle hul dogters Danest Cronjé, Rochelle Nolte en Francel Ferreira. Ronel Hulley was afwesig met die neem van die foto.
Verteenwoordigers van die Bybelgenootskap van Suid-Afrika het op Maandag 24 Februarie 80 Bybels aan die AGS Woord en Lewe-kerk in Bela-Bela geskenk. Die Bybels sal eersdaags aan behoeftige leerders van Laerskool Warmbad oorhandig word met die doel om geestelike groei in die leerders se lewe te bevorder. Die Bybelgenootskap vier vanjaar hul 200ste bestaansjaar. Op die foto is André Hibbert, Hans Barnard, Trevor Fester en Shane Fraser (Bybelgenootskap), Bets en André Kolwer, asook Neville Haarhoff tydens die oorhandiging.
