’n Boodskap is op Woensdag 12 Februarie op die gemeenskappolisiëringsforum se veiligheidsgroep geplaas waarin motorryers gewaarsku word dat skerp voorwerpe tussen die Carousel- en Pumulani-tolhekke, asook in die Pienaarsriviergebied, op die pad gevind is. Dit lyk volgens die foto asof die voorwerpe handvervaardig is en moedswillig geplaas is om skade aan voertuie te veroorsaak.
Talle rooftogte het verlede jaar op die N1-snelweg plaasgevind. Van die slagoffers van hierdie rooftogte het in hul polisieverklarings gesê hul voertuigbande het gebars weens skerp voorwerpe wat in die pad geplaas is.
Die nuutste voorval in die Bela-Bela-omgewing was op Vrydag 24 Januarie toe rowers passasiers in ’n minibus naby die Mantsole-weegbrug aangehou en van derduisende rande beroof het.
’n Woordvoerder van die polisie het aan Die Pos gesê daar is ’n moontlikheid dat van die sogenaamde slagoffers ’n aandeel in die rooftogte gehad het en die boosdoeners glo ingelig het waar en wanneer om toe te slaan. In talle van dié voorvalle is buitelanders, wat met baie kontant by hulle na buurlande reis, geteiken.
Kol. Abel Phetla, Bela-Bela-polisiestasiebevelvoerder, het by navraag gesê hoewel die Carousel-gebied buite Bela-Bela se grens val, kan die misdaad oorspoel na die Bela-Bela-omgewing. Hy het die egtheid van die foto bevestig.
In die meeste van die gevalle het die rooftogte tussen Donderdag en Saterdag plaasgevind, het Phetla gesê.
Die polisie raai intussen motorryers aan om op die uitkyk te wees vir vreemde voorwerpe in die pad. Indien hulle voertuigprobleme ondervind, word inwoners aangeraai om nie dadelik stil te hou nie, maar stadig aan te ry tot waar hulle veilig voel.
Die rooftogte word deur die polisie se misdaadintelligensie-eenheid ondersoek.
