![](https://images.caxton.co.za/wp-content/uploads/sites/134/2020/02/Piet-Venter.jpg)
Hulle het nie beplan om moord te pleeg nie; net om geld te steel.
Dít was die strekking van die getuienis wat op Woensdag 12 Februarie in Modimolle aangehoor is tydens die verhoor van vyf beskuldigdes in die moord op Piet Venter (51) op sy plaas in Rooiberg in November 2015.
Vroeër is getuienis in dié uitgerekte hofsaak aangehoor dat die nadoodse ondersoek gewys het Venter het versmoor. Sy arms en bene was glo vasgebind en ’n broekspyp was om sy nek vasgeknoop. Daar was vermoedelik kleefband om sy mond en oor sy neus. Venter se vasgebinde liggaam was toegerol in ’n mat.
Hy was ten tyde van die voorval in ’n verhouding met Mona Oosthuizen, wat tydens die aanval in die huis was. Sy word saam met haar seun Christopher Joubert, Louisa Ricco, Ruben Miles en JP Johannesse van die moord aangekla.
Hoewel Johan du Toit aanvanklik saam met die ander vyf aangekla is, het hy vir die staat getuig. Joubert en Du Toit het voorheen op die plaas gewerk.
Tydens hul onlangse verskyning het Johannesse, Ricco en Joubert getuig. Hulle het volgehou dat hulle plan net was om geld by Venter te steel.
Die saak is uitgestel tot Donderdag 12 Maart vir betoë. Landdros Pieter Manthatha sal dan ’n datum vir sy uitspraak vasstel.