Dr. Wynand Boshoff, LP: Vryheidsfront-Plus en hoofwoordvoerder: basiese onderwys, skryf:
Angie Motshekga, minister vir basiese onderwys, het luidens mediaberigte toegegee dat skole self kan besluit óf en hoe hulle die omstrede nuwe voorgeskrewe sillabus vir omvattende seksualiteitsonderrig wil aanbied. Dit het gevolg ná ’n gesprek met onderwysvakbonde.
Die VF-Plus verwelkom hierdie stap, omdat dit uitvoering gee aan die party se standpunt dat onderwysers professionele mense is en die finale bevoegdheid om kurrikulum te vorm, by hulle lê.
Die VF-Plus het ook daarop gewys dat onderwys ’n kulturele uitdrukking is en onder beheer van kultuurgroepe self moet staan en nie onder die sentrale regering soos tans die geval is nie.
Dit is nie toevallig dat die toegewing teenoor vakbonde gemaak is nie. Verskeie vakbonde het hul sterk teen dié onderrig uitgespreek. Hulle beskik oor die vermoë om die minister in ’n reeds problematiese omgewing met burgerlike ongehoorsaamheid te konfronteer.
Hierdie uitspraak van Motshekga is in sterk teenstelling met haar houding in die parlement verlede jaar. Toe het sy ’n karikatuur van die besware teen hierdie sillabus gemaak en dit arrogant van die hand gewys.
Hierdie verloop van sake behoort vir die ANC oor die algemeen ’n vingerwysing te wees. Dit is wel moontlik om hul parlementêre meerderheid te gebruik om alle teenstand te stoomroller, maar die werklikheid buite die parlement is meer ingewikkeld.
Terselfdertyd kan die burgerlike samelewing daaruit moed skep dat werklikhede selfs deur ’n arrogante regering soos die ANC in ag geneem moet word.
Wat wel nog van die minister verwag kan word, is om die teenstelling tussen haar uitsprake in die parlement en teenoor vakbonde met ’n openbare verklaring uit die weg te ruim.
