![](https://images.caxton.co.za/wp-content/uploads/sites/134/2020/01/bejaardes-pixabay.jpg)
Anne Joubert van Modimolle skryf:
Met verwysing na Maureen Neethling se brief wat in Die Pos van 24 Januarie verskyn het, deel ek ook graag ons positiewe ondervinding met die lesers.
Dit is prysenswaardig hoe ouer mense in ons kontrei met hoflikheid en deernis deur die personeel van verskeie staatsdepartemente behandel word.
Ons het verlede jaar buitengewone diens van SASSA se personeel ontvang toe ons aansoek gedoen het vir ouderdomspensioen. Aangesien my man ’n semi-invalide is, het Jackie en Jane (staatsamptenare) na ons huis gekom en binne 15 minute alle papierwerk afgehandel.
Ons is deurgaans met respek behandel en SASSA kan trots wees op hierdie werknemers wat die beeld van die departement bevorder. Die staatsdokter wat die mediese verslag saamgestel het, het ook deeglike werk gedoen en is nog ’n voorbeeld van puik dienslewering aan die publiek.
Dankie aan hierdie staatsamptenare wat puik diens lewer en dit vir die senior burgers makliker maak. Ons waardeer julle.