![](https://images.caxton.co.za/wp-content/uploads/sites/134/2020/01/poskantoor1.jpg)
Dit is nog onduidelik of daar meer as een inbreker was en op watter spesifieke dag die afgelope naweek die inbraak plaasgevind het.
Sonja Smalberger, bestuurder, het by navraag gesê die Poskantoor het sedert die laaste inbraak verlede jaar nuwe diefwering laat installeer om boosdoeners uit te hou, maar dit het hulle nie afgeskrik nie.
Die venster aan die agterkant van die gebou waardeur die diewe die vorige keer ingebreek het, is weer beskadig en die nuwe diefwering is oopgebuig om toegang tot die gebou te kry, het sy gesê.
Die verdagte(s) het hul weg gevind na die stoorkamer waar al die kleiner posstukke gestoor word en het al die pakkies oopgeskeur en die inhoud daarvan gebuit.
Sers. Frans Maponya, polisiewoordvoerder, het gesê die waarde van die gesteelde items beloop ongeveer R1 800 en die polisie ondersoek ’n saak van huisbraak en diefstal.
Hoewel Smalberger vermoed die inbraak is deur dieselfde verdagte(s) as verlede jaar gepleeg, kon die polisie dit nie bevestig voordat die ondersoek afgehandel is nie.
Kliënte wat posstukke verwag, word aangeraai om die poskantoor te besoek en eisvorms te voltooi. Indien hulle deur koerierondernemings, soos byvoorbeeld Wish, items aangekoop het en die aankope by die poskantoor afgehaal moet word, moet hulle bewysstukke van aankope na die polisie neem waar hulle ’n saak van diefstal kan open. Die saak moet ook met die koerieronderneming opgeneem word, het Smalberger gesê.