Bek-en-klouseer se angel steeds nie uit
Bek-en-klouseer is reeds op altesame tien plekke in Limpopo gevind en teen druktyd vandeesweek was daar sprake dat die huidige veeveilingsverbod na die hele land uitgebrei kan word.
![](https://images.caxton.co.za/wp-content/uploads/sites/134/2019/12/kaart.jpg)
Die presiese oorsprong van die bek-en-klouseer-uitbraak is egter nog nie bekend gemaak nie.
Die siekte het in die Molemole-omgewing noord van Polokwane uitgebreek.
Die departement van landbou, bosbou en visserye het erken dat dit dieselfde soort virus is as wat in Januarie vanjaar in die Vhembe-distrik uitgebreek het.
Die departement het die afgelope week in ’n verklaring bekendgemaak dat daar nou reeds 10 plekke — almal in Limpopo — is waar diere positief getoets is.
’n Verbod is die afgelope drie weke op alle veeveilings in Limpopo, Gauteng, Noordwes en Mpumalanga van krag.
Volgens die departement heers streng beheermaatreëls by die geaffekteerde abattoirs, voerkrale, veekrale en plase om verdere verspreiding te keer. Die departement plaas die blaam vir die verspreiding van die siekte op mense wat besmette diere versprei het. Boere, veilingshuise en ander betrokkenes in die landboubedryf wys egter weer vingers na die departement en sê die regering het in Januarie voete gesleep met die toepassing van beheermaatreëls en doen dit nou weer.
Die departement raai steeds mense in die veebedryf aan om van staats- of privaat veeartse gebruik te maak om hul diere te toets en om onder geen omstandighede vee te vervoer nie tensy diere siektevry verklaar en trokke gesteriliseer is.
Volgens inligting van die Bek-en-Klouseerforum (BK Forum) wat onlangs in Bela-Bela gestig is, is veeboere onder druk om vee vir ’n inkomste te verkoop en kan dit gebeur dat hulle nie gehoor gee aan die regering se versoeke dat geen vee vervoer mag word nie.
Die uitbraak kan gestuit word indien alle betrokkenes hul volle samewerking gee, maar omdat die presiese oorsprong van die huidige uitbraak nog nie vasgestel is nie, kan die verbod selfs langer duur as wat aanvanklik vermoed is.
Die forum waarsku dat mense wat hul vee op onwettige veilings verkoop, die kans staan om uitgebuit te word en die hele bedryf weens hul eie kortsigtigheid kan kelder. Die forum stel voor dat veeboere geduldig moet wees en wag totdat die verbod opgehef word.