Die Dameskring van Modimolle het op Maandag 2 Desember ’n witstrikkiedag gehou en heerlik saamgekuier en geëet. Voor sit Elize Roos, Riana Viljoen, Susan le Roux en Daleen van der Walt. Agter staan Anni Niewenhuis, Elsa Greyling, Ina Bonnette en Angelïque Bonnette (eregaste) en Delene Snyman. Die vroue het tydens die byeenkoms gepraat oor geweld teenoor vroue en kinders. Ina het ’n onvergeetlike bydrae gelewer toe sy vertel het van die wrede aanval op haar en die moord op haar seun in 2012. Haar eksman, Johan Kotzé, is tot lewenslange tronkstraf gevonnis oor dié gebeurtenis. Ina het aan die vroue vertel hoe sy dié trauma verwerk het. Die Dameskring se eerste vergadering vir 2020 vind op Maandag 20 Januarie plaas. Vir nadere besonderhede, skakel tel. 076 117 2976 of tel. (014) 717 2911. Almal is welkom.
Die Kokanje-aftreeoord se sosiale klub het op Vrydagaand 29 November hul Kersafsluiting gehou met Ansie van Niekerk op die klavier as begeleier. Die sangers was die formidabele Cantabile Trio wat bestaan uit Yvonne Lombaard, Schalk Vorster en George Linde. Dirk Venter, met sy diep basstem, was die gaskunstenaar. Daar is ook tydens die geleentheid afskeid geneem van Maureen Neethling wat 18 jaar Kokanje se sosiale klub bestuur het en nou so ’n bietjie gaan “aftree”. Die aand was ’n reusesukses met nie plek vir ’n muis in die saal nie. Op die foto is Linde, Neethling, Lombaard, Van Niekerk en Venter. Vorster staan agter.
Lifestyle Ministries in Bela-Bela het op Saterdag 30 November ’n markdag gehou om geld in te samel vir hul nuwe kerkgebou. Besoekers kon smul aan lekker kos en deur ’n verskeidenheid items by die verskillende stalletjies snuffel. Die volgende markdag word in Februarie 2020 gehou. Op die foto is Nadia, Theresa en John Edmond by hul snuffeltafel tydens die markdag.