Booswigte het op Donderdagaand 24 Oktober een van die kameras tussen Modimolle en Settlers beskadig wat juis opgerig is om verdagte aktiwiteite in die Waterberg-omgewing te moniteer.
Talle veiligheidskameras is sedert 2017 op verskeie plekke en langs openbare paaie op pale gemonteer met die doel om misdaad hok te slaan. Die aanvanklike projek was die breinkind van Kobus Germishuys, voorsitter van die Kariba-buurtwag.
Talle privaat eienaars het hul eie kamerastelsels aangeskaf en hul kameras aan die sentrale databasis laat koppel wat op nasionale vlak gemoniteer word.
Verdagte voertuignommerplate word op dié databasis gelaai en indien die betrokke voertuig in ’n omgewing opgemerk word, word die betrokke owerhede daarvan in kennis gestel.
Die kameraprojek het reeds talle suksesvolle inhegtenisnames vir die polisie opgelewer.
Germishuys het tydens die September-vergadering van die plaaslike veiligheidsgroep in Bela-Bela gesê die kameras is met tegnologie toegerus wat aandui of daarmee gepeuter is.
Louis Ebersöhn van African Wildlife Services (AWS) het by navraag gesê verdagtes het verlede week gepoog om sonkragpanele van ’n veiligheidskamera op die Doornput-pad tussen Modimolle en Settlers te steel.
Ebersöhn sê ’n inwoner het toevallig om ongeveer 21:00 verby die kamera gery en alarm gemaak toe hy onraad vermoed. Volgens foto’s van die toneel het die verdagtes probeer om die paal af te saag en ook boute wat die paal laat regop bly, losgeskroef.
AWS het reaksielede in die omgewing ontplooi as voorkomingsmaatreël.
Die paal is reeds die volgende dag herstel, het Ebersöhn gesê.
Ebersöhn het gesê privaat mense wat hul eie tyd opoffer om veiligheidsdienste te lewer, kry nie altyd genoeg erkenning nie. Hy het gesê die stelsel kan nog meer doeltreffend word indien ’n professionele reaksiespan saamgestel kan word om aan die hoof van dié projek te staan.
