Vyf mans is op Vrydag 18 Oktober in hegtenis geneem nadat die beeldmateriaal van die veiligheidskameras tussen Modimolle en Bela-Bela na bewering aan die Modimolle-polisie verklik het dat hul voertuig telkens ná ’n diefstal op dié pad gery het.
Die polisie, met die hulp van die gemeenskapspolisiëringsforums (GPF) van Modimolle en Bela-Bela, het die mans op die R101- en die Eersbewoond-pad voorgelê en die vyf in hegtenis geneem.
Volgens die polisie is vermoedelik gesteelde items ter waarde van sowat R244 800 in hul besit gevind. Dit sluit onder meer platskermtelevisies, elektriese gereedskap, ’n swysmasjien en drie motorfietse in.
Volgens AO James Findlay, woordvoerder van die Modimolle-polisie, het die Modimolle-polisie op Dinsdag 22 Oktober, in samewerking met maj. genl. Vincent Leshabane, distrikskommissaris in Ekurhuleni, en lede van die Ekurhuleni-polisie, op die verdagtes se huise in Ivory Park in Tembisa toegeslaan.
Daar is beslag gelê op ses platskermtelevisies, ’n rekenaarskerm, ’n gereedskapkis, ’n Lenovo-skootrekenaar, ’n Ryobi-skuurder, kampstoele, ’n Buffalo-kamofleerbaadjie en Samsung- en LG-hardeskywe. Volgens die polisie is al dié items vermoedelik gesteel.
“Ons gaan die regmatige eienaars van die goedere probeer opspoor,” het Findlay gesê.
Die verdagtes, ’n Suid-Afrikaner en vier Mosambiekse burgers, sal weer op Donderdag 31 Oktober in die hof in Modimolle verskyn.
