![](https://images.caxton.co.za/wp-content/uploads/sites/134/2019/10/korrupsie-freepik.jpg)
Marcelle Maritz, Vryheidsfront Plus: lid van die provinsiale wetgewer en provinsiale leier in Limpopo, skryf:
Die grootskeepse korrupsie in Limpopo is besig om ’n ernstige wending te neem en die VF Plus in dié provinsie veroordeel die doodsdreigemente teen die ANC se provinsiale sekretaris, Soviet Lekganyane, wat hom uitgespreek het teen dié korrupsie.
Die dreigemente volg nadat hy as lid van die provinsiale uitvoerende komitee (PUK) van die ANC ’n verslag oor die beweerde korrupsie in die Mogalakwena-munisipaliteit in Mokopane by Luthulihuis in Johannesburg ingedien het.
Die VF Plus dring daarop aan dat die probleem by die munisipaliteit dringende aandag op nasionale regeringsvlak kry en dat die dreigemente ernstig opgeneem word.
Vaaltyn Kekana, voorsitter van die munisipale openbare rekeningekomitee en Ralph Kanyane, ANC-distriksekretaris, is albei vanjaar helder oordag vermoor, kort voordat hulle óók ’n verslag oor korrupsie in die munisipaliteit bekend wou maak.
Die VF Plus het reeds in Augustus ’n versoek tot Basikopo Makamu, Limpopo se LUR vir samewerkende regering, menslike nedersettings en tradisionele sake (CoGHSTA), gerig vir die verwydering van Andrina Matsemela, burgemeester van Mokopane, weens beweerde ongerymdhede en dat ’n indringende ondersoek na die aangeleentheid gedoen word.
Dit is sorgwekkend dat daar tot vandag toe geen terugvoering of erkenning ontvang is van die LUR nie. Die VF Plus sal dit nie daar laat nie. Hoeveel mense moet sterf in die stryd teen korrupsie voordat die regering optree?