Die man word verbind met verskeie rooftogte wat die afgelope ruk plaasgevind het.
Volgens sers. Frans Maponya, Bela-Bela-polisiewoordvoerder, het die skietvoorval plaasgevind toe die polisie die verdagte genader het vir ondervraging. Die man het glo ’n mes te voorskyn gebring en ’n polisiebeampte aangeval.
Volgens die polisie word die verdagte tans onder polisiebewaking behandel.
Hy word met minstens vyf rooftogte verbind.
Die Pos het reeds verskeie kere berig oor die omgewing om die skouterrein wat ’n hoë gevaar inhou vir die talle mense wat daagliks tussen die Bela-Bela-township en die dorp na hul werkplekke stap.
Talle mense is reeds vanjaar tussen die Bela Mall en die township beroof.
Daar is tydens die dorp se jongste veiligheidsvergadering ’n stokkie gesteek voor die planne om die terrein skoon te brand omdat die brandgevaar tans te hoog is.
Die nasionale brandverbod het einde Mei in werking getree. Deeglike beheer en voorkomingsmaatreëls sal in plek wees voordat die grond gebrand word.