Die Dameskring van Modimolle het op Maandag 16 September ’n lentetee aangebied. Daar is gedigte voorgedra en die vroue het verhale gedeel oor die ontstaan en groei van die Dameskring as vroueorganisasie. Daarna is gesellig saamgekuier. Op die foto is Hettie Kotzé, Adri Nel, Anna Rossouw, Sylva de Vries, Mari Schwartz, Winnie Cilliers, Mona Roets en Rien Joubert.
Klub 60, wat reeds jare in Bela-Bela bekend is, het nou hul vlerke gesprei en op Maandag 16 September is die eerste gesellige byeenkoms in Modimolle gehou. Die klub skep die geleentheid vir mense bo 60 om nuwe vriende tydens maandelikse byeenkomste te ontmoet. Die Modimolle-klub het reeds 21 lede. Vir navrae oor die Modimolle-klub 60 kan mense vir Leonie Lombard bel by tel. 083 666 2754.
Die Bela-Bela-gemeenskap het afskeid geneem van sers. Morné Cloete wat ’n werkaanbod in die veiligheidsbedryf in Nieu-Seeland aanvaar het. Cloete was 19 jaar aan die Suid-Afrikaanse Polisie- diens betrokke en was voor sy uittrede in die Rust de Winter-omgewing gestasioneer. Hy het reeds op Dinsdag 17 September na die buiteland vertrek. Sy vrou en seun, Anzelle en Morné (jnr), beoog om in November by hom aan te sluit. Anzelle is ’n eiendomsagent in die dorp en Morné jnr. is besig met studies in die opvoedkunde en is ’n studenteonderwyser by Laerskool Warmbad. Op die foto is die gesin by die OR Tambo-lughawe toe Morné oorsee vertrek het.
Hierdie drie kunstenaars van Mookgophong, Ben Smit, Charmaine van der Linde en Ray Bresler, het op Vrydag 30 Augustus ’n heerlike kaas-en-wyngeselligheid aangebied om al hulle getroue ondersteuners te bedank vir hul lojaliteit. Die vure het hoog gebrand om die koue te verdryf en ’n lekker glasie wyn het gesorg vir ’n vrolike atmosfeer.
