Louis Meintjes, president: Transvaalse Landbou-unie (TLU SA), skryf:
Die opstoking en rassehaat wat tydens xenofobiese geweld in Suid-Afrika teen blankes aangevuur word, is vir TLU SA nie net onaanvaarbaar nie, maar ook uiters kommerwekkend.
Hoewel die presiese motief van groepe soos die BLF en EFF onseker is, is dit duidelik dat hulle rassehaat teen blankes verkondig en selfs so ver gaan om te sê dat geweld teen blankes regverdigbaar is.
Die leiers van die BLF en EFF, Andile Mngxitama en Julius Malema, en die sekretaris-generaal van die ANC, Ace Magashule, is die voorbokke met uitsprake waarin hulle hul ondersteuners aanmoedig om eerder blanke Suid-Afrikaners aan te val as swart buitelanders.
Mngxitama dreig dat “hulle” eendag teen die blankes sal draai en die wit minderheid sal blameer vir “hulle” armoede. Hy sê dat die plundering en oproer net die kleedrepetisie vir ’n burgeroorlog teen blankes is terwyl Malema sy “Afrika-broers en -susters” aanmoedig om eerder hul woede teen die “eienaars van rykdom — wit monopolistiese kapitaal” te mik. Magashule ontken dat xenofobie enigsins die rede vir die onluste is omdat blankes nie aangeval word nie.
Moorde op boere op hul plase is in verhouding meer as drie keer soveel as moorde op die gemiddelde Suid-Afrikaner. Baie van die plaasmoorde kan toegeskryf word aan die irrasionele haat vir blankes wat verkondig word deur hierdie sogenaamde revolusionêre groepe.
Weerstand teen die revolusionêre groepe se ideologie en fisieke aanslag is vir TLU SA van kardinale belang. Omdat ’n irrasionele ideologie deel uitmaak van die aanslag kan ’n mens dit nie teenstaan soos ’n mens enige ander aanslag teenstaan nie.
TLU SA se Stop BLF-veldtog is nie op een persoon gemik nie, maar op ’n irrasionele revolusionêre ideologie wat haat en geweld teen blankes aanmoedig. (Brief verkort. — Red.)