![](https://images.caxton.co.za/wp-content/uploads/sites/134/2019/09/kinders-misdaad-freepik.jpg)
Jean Kriek, Vryheidsfront Plus-jeugleier, skryf:
Die gereg moet geen simpatie betoon vir mense wat by misdaad teen kinders betrokke is nie soos met die jongste voorval waar vier mense ’n vyfjarige kind van Vanderbijlpark uit haar ma se hande geruk en met haar gevlug het nie.
Die mans het met haar in ’n wit Toyota Fortuner vanuit ’n parkeerterrein oorkant Laerskool Kollegepark gevlug. Die polisie en lede van die gemeenskapspolisiëringsforum (GPF) was binne minute besig om te help soek. Paaie is gepatrolleer en ingange na voorstede is geblokkeer.
Die VF Plus se raadslid in Vanderbijlpark, Gerda Senekal, ’n lid van die polisiëringsforum, het haar dadelik by die georgani-seerde span geskaar om te help met die soektog.
Volgens Missing Children South Afrika word daar daagliks voorvalle aangemeld van kinders wat wegraak. Hierdie kommerwekkende tendens kan nie voortduur nie en die polisie sal spesiale aandag aan die voorkoming van kinderontvoering moet gee.
Die veiligheid en beskerming van kinders is nie net die verantwoordelikheid van owerhede en organisasies nie. Ouers het ’n plig om toe te sien dat hul kinders veilig is en moet hulle, indien moontlik, na hul bestemming vergesel en daar gaan haal.
Die VF Plus raai ouers aan om betroubare elektroniese hulpmiddels te gebruik om veral jong kinders te volg en sodoende te weet waar hulle beweeg. Kinders kan ook geleer word om hul ouers in kennis te stel indien hulle hulp benodig.
Die party wil die polisie en GPF-lede vir hul vinnige optrede bedank.