Volgens die polisie is die eienaar, Simon Malebane (61), vasgebind by die plaashuis dood aangetref. Hy is na verneem word dood nadat hy erg aangerand is. Malebane was ’n naweekboer.
’n Plaaswerker, Daniel Ngoagamobe (59), is ook met ’n skietwond naby die plaashuis dood gevind.
Dit is tans onduidelik of iets tydens die aanval gesteel is, het die polisie gesê.
Die motief vir die moord is ook onbekend, maar gerugte dat ander plaaswerkers by die voorval betrokke was, word ondersoek. Malebane was betrokke by groot saketransaksies en dit kan ook nie buite rekening gelaat word nie, het die polisie gesê.
Emden Els, voorsitter van die Radium-buurtwag, het gesê Malebane was ’n stoere sakeman in die Radium-gemeenskap.
Die moorde word verder ondersoek.
- ’n Boodskap wat spesifieke inligting met betrekking tot die voorval bevat, is sedert Saterdag op sosiale media versprei. Die boodskap bevat inligting en sensitiewe detail van die misdaadtoneel en modus operandi van die aanvallers.Die Pos verneem die boodskap was nie vir die publiek bestem nie, maar vir die ondersoekspan.
Die polisie waarsku die publiek om geen sensitiewe inligting oor misdaadtonele te versprei nie. Die uitlek van sulke inligting kan die ondersoek belemmer. Slegs amptelike polisiewoordvoerders mag inligting vrystel.
Mense wat sulke inligting kwaadwillig openbaar maak, kan in die moeilikheid beland, het die polisie gewaarsku.