Volgens die polisie het inbrekers die naweek van 20-21 Julie by ’n huis in die Hide Away Estate naby Buyskop op die Eersbewoond-pad buite Bela-Bela ingebreek. Die eienaar was nie tuis nie.
Volgens sers. Frans Maponya, Bela-Bela-polisiewoordvoerder, het die diewe die huis se veiligheidstralies oopgedwing en só toegang tot die woning verkry.
Die diewe het ’n wapenkluis oopgesaag en ’n handwapen en jaggeweer gebuit.
Hulle het ook juwele, kontant en ’n versameling messe gesteel.
Die totale waarde van die gesteelde items word op R52 000 geraam.
Die Pos kon teen druktyd nog nie die Hide Away-bestuur om kommentaar bereik nie.
’n Saak van huisbraak is by die polisie geopen en die saak word verder ondersoek, het Maponya gesê.
