Bennie van Zyl, hoofbestuurder: Transvaalse Landbou-unie SA (TLU SA), skryf:
TLU SA het met waardering kennis geneem van pres. Cyril Ramaphosa se veroordeling van plaasmoorde tydens sy repliek op die presidensie se begrotingsdebat in die parlement, maar dring steeds daarop aan dat hy hom amptelik vir ’n staking van die aanvalle beywer.
Die veroordeling het gekom nadat die leier van die VF Plus, dr. Pieter Groenewald, hom weer gevra het waarom hy plaasmoorde nie amptelik veroordeel nie. TLU SA het ook al tydens verskeie geleenthede gevra dat die president ’n amptelike verklaring oor plaasmoorde moet uitreik.
Ramaphosa het gesê dat hy plaasmoorde reeds in die verlede veroordeel het en sal voortgaan om dit te veroordeel. Hy het verder — in Afrikaans — gesê dat elke lewe in die land gelyke waarde het en dat elke moord en geweldsmisdaad sonder onderskeid veroordeel moet word.
Ons is bly dat die stilte oor plaasaanvalle uiteindelik verbreek is, maar ons sal graag ook wil hoor dat hy ’n oproep maak dat dit gestaak moet word. Volgens TLU SA se voorvalleregister het die plaasmoordsyfer begin Julie op 30 vir die jaar gestaan en plaasaanvalle op 217.