Man wat verdrink steeds onbekend
Die identiteit van die man wat verlede week in die dorpsdam in Modimolle verdrink het, is steeds onbekend.
Volgens die Modimolle-polisie het niemand nog na vore gekom met inligting oor wie die man is nie of waar hy gewoon het nie. Die man, na raming in sy laat veertigs of vroeë vyftigs, het op Maandag 1 Julie net ná 09:00 ten aanskoue van talle inwoners verdrink. AO James Findlay, woordvoerder van die Modimolle-polisie, het gesê ooggetuies het vertel dat die man sy klere uitgetrek en daarna heen en weer in die koue damwater geswem het. Hy het terug wal toe geswem, waarna hy onder die water verdwyn het. ’n Man wat gesien het wat gebeur, het die polisie ontbied.
Die polisie se soek-en-reddingspan en polisieduikers van Polokwane het die man se lewelose liggaam kort daarna uit die water gehaal.
Inwoners gis dat die man een van die sluipslapers kan wees wat in die bosse om die dam bly. Indien die man nie uitgeken word nie, sal hy as ’n “John Doe”, oftewel onbekende persoon, begrawe word, het die polisie bevestig.
Indien iemand inligting het oor die man se identiteit, kan hulle die ondersoekbeampte, sers. Ciska Fourie, bel by tel. 082 927 7756.