Modimolle-man weer in hof oor ‘hondegevegte’
Die saak teen Madiba Hofney Maluleka (29), wat in April in hegtenis geneem is nadat die dierebeskermingsvereniging (DBV) op 22 honde, drie skilpaaie en twee varke op sy erf beslag gelê het, is op Dinsdag 9 Julie in die hof in Modimolle weer uitgestel na ’n latere hofdatum.
Maluleka, wat uit is op borgtog, staan tereg op 12 aanklagte wat verband hou met hondegevegte en wreedheid teenoor diere, asook die onwettige besit van wild. Die saak teen Maluleka is uitgestel omdat daar nog uitstaande verslae is waarvoor die polisie wag.
Volgens die DBV was die honde meestal pitboelterriërs, bulterriërs en boerboele en die omstandighede waarin hulle gevind is, was haglik en baie ongesond. ’n Woordvoerder van die DBV het gesê die honde se wonde het duidelike tekens getoon dat hulle in gevegte gebruik is en dat daar met hulle gejag is.
Volgens Wendy Willson van die DBV is al die diere na hul geriewe in Johannesburg vervoer waar hulle behandel is. “Van die diere het erge beserings gehad en van hulle moes ongelukkig vankant gemaak word. Die goeie nuus is dat baie van die honde ook in ’n rehabilitasieprogram is en vier honde is reeds deur mense aangeneem wat wonderlike huise aan hulle bied.” Dié honde, sê sy, is vet en gelukkig, maar het huise nodig wat na hul spesifieke behoeftes kan omsien omdat hulle mishandel is. “Hulle is baie liefdevolle honde,” het sy gesê.
Die twee varke, intussen herdoop na Ginger en Chai, het ook behandeling ontvang en een word ook binnekort aangeneem. Die drie skilpaaie, waarvan een ’n bergskilpad is en twee skarnierskilpaaie, is na die Johannesburgse Wildlewe-hospitaal vir behandeling en rehabilitasie geneem.
“Modimolle kan trots wees op dié ingryping. Die 22 honde, drie skilpaaie en twee varke is uit haglike omstandighede verwyder omdat inwoners die moed gehad het om in te tree,” het Willson gesê.