Die voorval het op Donderdag 20 Junie in die McKenzie-omgewing buite Radium gebeur.
Lede van die Heritage Protection Group (HPG), asook die Bela-Bela-, Mokopane- en Mahwelereng-polisie het tydens ’n gesamentlike operasie twee mans onderskeidelik in Mokopane en in Hammanskraal aangekeer.
Die verdagtes, Justice Mudau (34) en William Bapela (69), is met gesteelde items wat aan die Prinsloos behoort, betrap, het sers. Frans Maponya, Bela-Bela-polisiewoordvoerder, gesê. Mudau is van Zimbabwe.
Die items wat teruggekry is, sluit in ’n selfoon, klere, parfuum en huishoudelike items.
Maponya het voorts gesê nadat ’n uitkenningsparade gehou is, het ander huisroofslagoffers in dieselfde omgewing na vore gekom. Mudau is toe met ander verwante misdade verbind, het Maponya gesê.
Die Prinsloos is die betrokke oggend om 03:00 deur vyf rowers in hul slaapkamers verras. Die drie is vasgebind en met twee handwapens en ’n AK47-aanvalsgeweer aangehou.
Die rowers het toegang tot die huis verkry deur ’n venster oop te dwing en een van die verdagtes het vermoedelik daardeur geklim en die deure vir die ander oopgesluit. Die polisie het gesê een van die rowers was vermoedelik ’n vrou.
Die rowers het op die vlug geslaan met verskeie gesteelde items. ’n Handwapen van die Prinsloos is ook gesteel.
Volgens Maponya is geen handwapen tydens die onlangse inhegtenisname teruggevind nie en die ondersoek na die ander verdagtes duur voort.
Mudau en Bapela het op Maandag 8 Julie in die hof verskyn op ’n klag van huisroof.
Die saak is uitgestel na Woensdag 17 Julie sodat hulle regshulp kan inwin.
Hulle bly in aanhouding.
