Dié Vaaljapie brul nog dat die stof so staan
Vaaljapie-trekkers het diep spore in die grond én harte van talle boere getrap.
Jeremy Augustyn (44) van Vaalwater het aan Die Pos vertel hy het ’n oorspronklike Vaaljapie saam met die grond waarop Yiwarra Game Lodge is, gekoop toe hulle gesin verlede jaar uit George na Vaalwater verhuis het.
Hulle het die plaas se naam verander na Waterbury Wilderness Retreat. Hulle boer uitsluitlik met wild en spesialiseer in die teel van Zambiese swartwitpense.
Augustyn sê die oorspronklike plaatjie op die Vaaljapie-trekker is ongelukkig af en daarom is die presiese jaartal en model nie met die eerste blik sigbaar nie. Hy is egter tans besig met navorsing om die trekker se herkoms te bepaal.
Augustyn het aan die Pos gesê hul voorman, wat jare op die plaas werk en ook vir die vorige eienaar gewerk het, het by navraag aan hom gesê sover hy weet, werk dié trekker nog goed en kort hy net ’n nuwe battery. Hy het ook vertel dat die koedoes op die plaas by geleentheid die bedrading van die trekker afgekou het.
Volgens Augustyn het die werktuigkundige wat daarna die trekker herstel en gediens het, gesê dat hy nog nie tevore ’n ou Vaaljapie teëgekom het wat in so ’n goeie werkende toestand is nie.
Augustyn het verduidelik dat die trekker se hidromeganiese stelsel, die enjin en bedrading nagegaan is en die trekker het ook nuwe bande en ’n harnas gekry.
Ons gebruik maar meestal ons nuwer model trekker vir die maak van paaie en ander harde werk op die plaas. “Dié ou model sal egter altyd ’n ereplek hê. Die nostalgie van die ou werktuie laat ’n mens met trots terugdink aan die gehalte produkte van weleer,” het Augustyn gesê.
