Naboom-gholfklub spog met nuwe gholfkarretjies
Gerugte dat die Naboom-gholfklub sy deure gaan sluit, is onwaar, het die span wat aan die stuur van sake staan die afgelope week aan Die Pos gesê.
![](https://images.caxton.co.za/wp-content/uploads/sites/134/2019/07/gholfkarretjies.jpg)
Inteendeel, die onlangse gewerskaf by die baan bring júís goeie nuus vir gholfspelers.
Volgens Jeff Coppen, voorsitter van die klub, en Roelf du Toit, wat sedert September 2018 die bestuurder by die klub is, spog die klub nou met nuwe gholfkarretjies en is daar talle opgraderings en veranderinge by die gholfbaan aangebring.
Coppen, wat al 30 jaar by die Naboom-gholfklub betrokke is en verskeie kere as voorsitter gedien het, was die weldoener wat gesorg het vir die sewe nuwe gholfkarretjies.
Volgens Du Toit het die klub tans 250 lede. Nuwe wateropgaartenks is geïnstalleer wat voldoende is vir die klubhuis se behoeftes.
Coppen en Du Toit is ook besig met verbeteringe by die klubhuis wat `n “pro shop” en nuwe vertoonkas vir die trofeë insluit. Kobus Heystek sorg dat die setperke mooi bly en die watergate op die negeputjiebaan is onlangs in sandbanke omskep. Spreiligte is by die oefenset- en afslaanperk aangebring wat dit moontlik maak om saans oefenhoue te slaan. Die baan is sewe dae van die week oop en kompetisies word Saterdae gehou.
Die jaarlikse klubkampioenskap word op Vrydag 18 Julie en Saterdag 19 Julie aangebied. Dit sluit spelers in die A-,B- en C-afdelings in. Die Kankervereniging van Suid-Afrika (Kansa) het ook onlangs ’n geslaagde vrouegholfdag op die baan aangebied. Volgens Coppen was dit die meeste vroue wat nóg op een slag op die baan was.