Brandverbod tree vroeër in werking
Die verbod op die maak van oop vure in die Bela-Bela-omgewing tree amptelik op Vrydag 31 Mei in werking.
Die besluit is deur lede van die verskillende brandsektore, asook die Bela-Belabrandbeskermingsvereniging, geneem nadat enkele veldbrande in die Waterberg-omgewing voorgekom het. Die reënseisoen het ook vanjaar vroeër as normaalweg geëindig terwyl temperature steeds bogemiddeld warm is.
Die nasionale brandbeheerwet vereis dat grondeienaars jaarliks brandbane om hul eiendomme moet maak in die tyd voordat die nuwe brandverbod aangekondig word. Vorige jare is dié verbod eers teen einde Junie ingestel.
Grondeienaars kan tans slegs brandbane met behulp van meganiese of chemiese maniere maak, het Arnaud Le Roux van die brandbeskermingsvereniging gesê. Hy beklemtoon dat die tydperk om voorbrande te maak, verstryk het.
Lede van die Baviaansberg-brandsektor het op Saterdag 25 Mei verskillende eiendomme buite Bela-Bela besoek en die standaard van die eiendomme se brandbane ondersoek, het Le Roux gesê.
“Die doel daarvan was om lede van die brandbeskermingsvereniging op hoogte te hou van die liggings van brandbane en toegangsroetes indien brande onverwags uitbreek.
Kaarte van elke eiendom word ook deur middel van selfoontoeps aan die lede beskikbaar gestel.
“Ons stel die inspeksies en verkryging van kaarte voor, want dit is tydens sulke geleenthede dat grondeienaars mekaar raad kan gee en mekaar beter kan leer ken.”
Die brandbeskermingsvereniging beoog om in Julie ’n inligtingsdag by die Sondela-natuurreservaat te hou waar grondeienaars hul werkers kan laat oplei om brande te bestry, het Le Roux gesê. Die grondeienaars woon die inligtingsessie by terwyl die werkers deur lede van die provinsiale Working on Fire-groep opgelei word.
Hoewel die datum nog nie gefinaliseer is nie, word alle grondeienaars nou reeds vriendelik genooi om dit by te woon, het Le Roux gesê. Hou Die Pos dop vir die datum.